Travay kominiss

10 juin 2010 – Mi koné pa si zot la antandi Vladimir Poutine kozé lot soir. Momandoné li la di : dann listoir son péi, néna “ lépok zariss ”, lépok “ estaliniènn ”, aprésa “ lépok kominiss ”…ziska sak la amèn azot dann sitïasion koméla – li la pa gaingne di koman i apèl, é mi kroi i vo mié li té i di pa rien…

Mé sak la mèt amoin sé antann boug-la kozé dessï in lépok “ kominiss ” apré lo passaz lo caterpilar… Avan somanké, dann tan bann soviet. Mé apré… kan-sa ? Gorbatchev pétèt noré fé in afèr pou révèy lo pèp, fé lèv ali… Sèlman la pa donn ali lo tan.

Sak mi voi, sé lo travay kominiss i avans dann in bon pé péi, mé lé difissil anfèrm ali dann in “ lépok ” sinon sa in “ sistèm ” gouvèrneman. Pou moin, sé in afèr lé ankor dovan nou, nou viv dedan é nou pé préparé, mé néna ankor bon pé travay pou fé avan nou gaingne baléyé tout so moustranïr néna in pé partou. Lo plï inportan pou nou, isi La Rényon : mèt anou dakor dessï in loriantsion politik ansanm dé-troi priorité pou fé avansé, é pou anpar lo plï maléré dann sitiasion la kriz.

Mé in lorantasion politik-la, sa lé pa in programme pou inn-dé mandatïr konsey rézional sinonsa zélèksion présidansièl : sé plïske sa. I fo néna dedan lo bann zingrédian i fé lo mayaz ansanm tout’ bann Réyoné i vé mèt anlèr nout péi, mèt anlèr La Rényon : kisoi kominiss, sosialiss, bann travayèr krétien, zindouiss, mizilman… bann “ lindépandantiss ” (…indèksé ! eskiz ! la shapé…), bann “ rien di tou ” pourvï zot lé pré fé sakrifiss pour lintéré zénéral lo péi. Sof koman, anon rassanm tout, kont in politik i ékraz touzour plïss sak lé plï fay.

Mé rasanm tout-la… sa i vé dir bann rasanblèr i doi bien kozé rantr zot avan, èt bien klèr si kèl baz zot i sar rasanblé. Lo diskision rantr bann kominiss i fé parti lo travay lo rasanbleman : é dopi konbien tan la pa fé sa dann PCR ?