A zot osi, zot i pé pass témoin ?

 

Di le difikilté ou nana, ou bien si ou lé dann in group formasion, remiz a nivo… Koman i espas ? Kosa ou atann ? Kosa néna dan out kartié pou done domoun lanvi lir, lanvi aprann pli loin ?

Si ou lé in formatèr, ou bien si ou donn la min domoun lé dann malizé akoz zot i koné pa ékrir…

Azot osi, di zot lespérians…

 

« Moin la zamé été rézinié… Moin té i rabésé pa moin »

Marie-Reine, 47 an

« Moin mi sort la P’tite-Ile. Moin la pa parti lékol tro lontan, moin la arété moin navé 8 an. Falé nou té i yèd bann moman ek papa travayé. Mon papa, mon momon té i gingn pa lir. Mon papa té i travay dann bitasion li té i fé bokou d’métié. Li té i konstrui la kaz, li té i okip la tèr. Moin néna sink sèr ek troi frèr. Mon gran sèr la parti inn ti pé loin, banna la done aèl in ti pé plis lé moiyin. Mi kroi èl la ariv an segonn. Nou, le rès, nou té i sava pa lékol toulézour. (…)

Minmsi moin lavé arèt lékol, kan momon té i anvoy amoin la boutik, lontan banna té i mèt la mori ou sounouk dann papié zournal, alor moin té i ramas le ti papié pou moin lir, pou moin aprann. Si mi konésé pa in mo moin té i mèt inn ti tré dosou é apré mi demandé domoun kosa té i vé dir. Moin la apri a lir komsa.

Moin la aprann par moin-mèm épi mon mari la èd amoin. Moin la marié a 19 an. Li, li la ariv an fin détid. Moin la okip son bann paran ke lété andikapé é dèk mi trouvé in papié ousa lavé in nafèr lété ékri desi, bin moin té i sèy lir. Moin té i demann ali. Li té i pran osi banndésiné, bann liv Rocky, li té i lir é té i esplik amoin.

Moin, moin la touzour bien viv, minmsi moin té i gingn pa tro lir, pa tro ekrir, moin la zamé pansé ke moin lété an desou lé zot. Moin la zamé été rézinié, moin la vouli amélioré, aprann. Moin té i rabésé pa moin. Kan navé in papié ladministrasion pou ranpli moin té i domann mon mari, parfoi mi éséyé de ranplir osi. Moin la zamé domann domoun. Soi li té i ranpli, soi nou té i fé nout dé avek. (…)

Lé pa dan la formasion la aprann amoin lir. Moin la touzour lir zournal, tout sort ti revi ke moin lavé. Sé ékrir ke moin la aprann parske moin té i koné pa. (…} In shèk moin té i koné pa ranplir, na bokou papié ladministrasion moin té i gingn pa fé é ke mintnan mi konpran. Lèt motivasion, CV, tousala moin la aprann. (…)

Zordi moin la pi bezoin domann domoun, mi gingn lir, ékrir, moin lé indépandante. Kan la formasion sar fini, mi voudré ésèy rouv inn ti stand légim koté mon kaz, mi vann déza flèr pour 1é novanm é 1é mé. Sé pa akoz ou i gingn pa lir ou i gingn pa ékrir ke ou i gingn pa viv, mé kan ou i gingn ou i viv mié. »

« Moin la inn ti pé ont »

David, 27 an

Moin lé né Saint-Louis, mé moin la parti abit la kaz mon tati la Ravine des Cabris moin lavé pétèt 11 an. La sitiasion ek mon momon, mon papa té inn ti pé konpliké.

Moin la parti lékol ziska 3èm. Moin la pa gingn alé pli loin. Moin la touzour gingn difikilté lékol sirtout an mat. Sinon mi gingn lir, mi gingn ékrir. Mé mat moin té i konpran pi rien sirtou soustraksion. Le bann prof té i pran le tan esplik lé zot mé té i pran pa le tan esplik amoin. Moin moin té i yèm alé lékol pou aprann, pou dékouv in ta zafèr. Mé banna té i blok mon tèt. O final moin la désid arèt lékol. (…)

Moin la gingn mon CAP agrikol. Apré moin la koup la kane. Mé mon rèv sé lortikiltir. Sé pou sa moin la vni an remiz a nivo. Mi vé travay dann in pépinièr. (…)

Kan mi gingn pa fé in nafèr mi di mon kouzine èd amoin. Moin na kouzine i sar lékol donk mi domann azot. Banna la ariv loin. (…) Amoin mon problèm sé plito la timidité, mi oz pa. Moin la inn ti pé ont. Mon momon, mon papa la pa parti lékol. Mon papa té koupèr d’kane. Moin mi vé ansort amoin mié. »

(source : Akoz, désanm 2007)