Maloya

Fonnkèr-la lé dann liv Danyèl Waro Démavouz la vi (Grand Océan, 1996) ; Carpanin Marimoutou la shant ali dann la fèt 10 mai 2010, o Port.

Lékritir lé sat lotèr (lékritir 77)

 

Doudoup doudoup dann kèr nout vyé zansèt

Konm an sabouk dann do kaf i pèt

Kisik kisik pay kann dann kwin zorèy

malbar maloubarèz désou la sann i brèz

romans boulan i gonm ansanm batarsité

servis maligas i ronm lansan dann kabaré.

 

Maloya la gatir lo kor lo kèr lo san

Lafrik Lérop èk Linn Lazi sanm loséan

maloya garnitir koktèl zardin groblan

dann fon laba transpir pat zonn tiblan.

 

Té koktèl molotov po militan

bébèt la dinité po sobat dann fénoir

parla zané swasant

misyé préfé la Frans

po aprop nout listwar

té vé pa domoun i sant

maloya pèp, lam i trans

maloya mour karès i dans

kaz Firmin, kaz Baba kaz Lorwa

Singay sapèl mizèr dann bal tamoul i poulèr

Lélé osi dann ta épi Tifrèr.

 

Fanm banna, maloya

maloya dann zané swasanndis

bann parti kominiss

i fane ali partou dann kèr zanfan péi

li ardobout andyab, li arpran favèr

po li arni Lamour

po li arni Bondyé

po li arni in Moun

po désyèk-désyèk

po nout létérnité.