Fonnkèr pou domin

 

Ingrid Varon

 

Mwin la pa ginyé gran matin

Mé mwin va ginyé po mwin domin

Ma giny mon manzé

Ansréti inn ti boushé

 

Mwin la gèt monn ti parkoté

Son zyé malizé la kozé

Son vant la kriyé

Done ali son boushé manzé

 

A kan minm mon zabo lapo séré

Mon zyé dan son zyé la tonm malizé

Mon kér la séré

Done ali mon boushé manzé                                      

 

Mwin la pa planté gran matin,

Mé mwin va planté po mwin domin

Ma plant mon manzé, ansréti inn ti boushé

 

Na pwin la mizèr dan mon gozyé,

Nana piman sék apo pwaké

Teyn pa mon fé

Lès ali flanbé

 

Apa la mizèr la fé mon manzé

Na gazon dori sék ek piman krazé

Teyn pa mon fé

Lès ali krouté

 

Mwin la pa révé gran matin,

Mé mwin va révé po mwin domin

Ma rèv mon pli zoli

Ansréti mon lotonomi

 

Na pi la mizèr dan mon léspri

Na kadans la vi ek mon fonnkèzri

Lès amwin grandi, mi vé kontant mon péi !

 

Na mon rèvolisyon dan mon fonnkèzri

Ek lo rèv mon péi la pou grandi

Li grandi dan mwin, li va kontant amwin minm !

 

 

Nou la pa révé gran matin

Mé nou va révé po nou domin

Na rèv nout pli zoli

Ansréti in …(lotonomi…?)

 

Na lo rèv in domin dan zot léspri ?!

Anon invant ali po La Rényon.

 

Anon grandi ansanm, nou va kontant nout péi !